Գիտաժողովը սկիզբ էր, որի շարունակության տերը բոլորս ենք

Փետրվար 28, 2011թ. 10:30

Փետրվարի 26-ին Հայաստանի գրողների միության մեծ դահլիճում «Հայրենականչ» հասարակական կազմակերպությունը հրավիրել էր գիտաժողով, որի թեման էր` «Արևմտյան Հայաստան. բնիկ ժողովրդի պահանջատիրության իրավաքաղաքական հիմքերը»:
Գիտաժողովի կազմակերպիչներն այն համոզման են, որ եկել է մեր ազգային նպատակների իրականացման ուղղությամբ համատեղ գործելու ժամանակը: Իսկ այս առումով շատ կարևոր է մտավորական ներուժի համախմբումը:
Ժամանակն է, որ կորոսյալ հայրենիքի առասպելը շոշափելիորեն ընկալվի իբրև իրական պահանջատիրություն, տանտիրոջ տունդարձի իրավունք և չափածո խոսքից վերածվի իրավական փաստաթղթերի:
Մեր հայրենքի մի մեծ հատվածը` բռնզավթված Արևմտյան Հայաստանը միֆ չէ, ունենք միջազգային իրավունքով ամրագրված  հիմքեր, մեր պահանջատիրությունը ընդունված այդ իրավունքով պաշտպանելու համար:
Հայաստանի Հանրապետությունում «Հայրենականչ» հայրենասիրական,  լրատվական հասարակական կազմակերպության ստեղծմամբ գիտաժողովի կազմակերպիչները  հավաստեցին, որ պահանջատիրության իրական գաղափարը սնուցվելու է Հայաստանի անկախ Հանրապետությունում` բոլոր մակարդակներով` պետական և հասարակական, քանզի համազգային խնդիրը չունի այլ հասցեատեր, քան  ժողովուրդը:
Մեր պահանջը ոչ թե տարածքի է, այլ Հայրենիքի: Թուրքիային Հաագայի դատարան բերելու համար լրջագույն, տևական և հետևողական աշխատանք է հարկավոր թե’ Սփյուռքում, թե Հայաստանում:

Կազմակերպիչների  նպատակն է շարունակել այս ուղղությամբ ձեռնարկված քայլերը` դրանք ընթացք դարձնելու համար, համալրել պահանջատիրության իրավագիտական այն հիմքը, որ ստեղծվել է առ այսօր:
Ինչ-որ առումով, գիտաժողովը  սկիզբ է, որի շարունակության տերը բոլորս ենք:



Գիտաժողովի ընթացքում հնչեցին արժեքավոր զեկուցումներ ու ելույթներ: Զեկուցումներով հանդես եկան` Արևմտյան Հայաստանի հայերի ազգային խորհրդի նախագահ Արմենակ Աբրահամյանը,
բանասիրական գիտություների դոկտոր, բանահավաք, ազգագրագետ Վերժինե Սվազլյանը «Հայոց ցեղասպանության ականատես վերապրողների վկայությունները` որպես իրավաքաղաքական պահանջատիրության գործոն» թեմայով,
բանասիրական գիտությունների թեկնածու, դոցենտ Ավիկ Մարությանը. զեկուցման թեման էր «Լեզվական ցեղասպանություն»,
պատմական գիտությունների թեկնածու, դոցենտ Ավիկ Հարությունյանը` «Արևմտյան Հայաստանի եկեղեցիների և վանքերի բռնազավթված և ոչնչացված ունեցվածքի փոխհատուցման իրավական հիմքերը» թեմայով.
Քաղաքական գիտությունների դոկտոր Լևոն Շիրինյանը խոսեց` «Արևմտյան Հայաստանի հայերի հայրենատիրության իրավաքաղաքական հարցի շուրջ»:
Պատմական գիտությունների դոկտոր, պրոֆեսոր Աշոտ Փիլիպոսյանը հանգամանորեն ներկայացրեց «Ուրարտական հուշարձանների վիճակը Արևմտյան Հայաստանում»
Եզրափակիչ զեկուցմամբ հանդես եկավ քաղաքագետ, ‹‹Ուխտ Արարատի›› հայրենասիրական հասարակական նախաձեռնության աշխատանքների համակարգող և համանուն պարբերականի գլխավոր խմբագիր Տիգրան Փաշաբեզյանը` «ԼՂՀ հակամարտության և հայ-թուրքական հարաբերությունների (հայկական հարցի լուծման ) իրավական ուղիները» թեմայով:


Ելույթներով հանդես եկան ԵՊՀ պատմության ֆակուլտետի դեկան, պատմական գիտությունների դոկտոր պրոֆեսոր Էդիկ Մինասյանը, ԵՊՀ հայոց պատմության ամբիոնի վարիչ, գիտությունների ազգային ակադեմիայի թղթակից անդամ Բաբկեն Հարությունյանը, հոգեբան Կարինե Նալչաջյանը,  «Կարին» ազգագրական համույթի ղեկավար Գագիկ Գինոսյանը, «Հայազն» երիտասարդների միաբանության նախագահ Արմեն Մկրտչյանը, մաթեմատիկոս Վաչագան Վահրադյանը, և ուրիշներ:
Գիտաժողովում հնչած զեկուցումները, արտահայտված կարծիքներն ու տեսակետները կամփոփվեն հատուկ թողարկման մեջ:
ArmAr.am