Օգոստոս 10, 2010 | 13:34
Հայաստանի զինված ուժերի սպառազինության ծրագրերի իրագործումը, նաեւ ռազմարդյունաբերական համալիրի ծրագրերի իրականացումը որակապես նոր մակարդակի կբարձրացնեն Հայաստանի զինված ուժերը: Այդ մասին լրագրողների հետ զրույցում օգոստոսի 10-ին հայտնել է Հայաստանի պաշտպանության նախարար Սեյրան Օհանյանը:
Ըստ նախարարի՝ ծրագրերը շատ իրատեսական են, համապատասխանում են Հայաստանի ֆինանսական պոտենցիալին եւ կիրականացվեն նախատեսված ժամկետներում:
«Դրանք ներառում են գերժամանակակից տեխնիկայի ձեռքբերում եւ տեղում արտադրություն: Ներառում են մասնավորապես հեռահար կրակային խոցման հնարավորությունների զարգացում, նաեւ գերճշգրիտ համակարգերի ներդրում, ինչը հնարավորություն կտա նվազագույնի հասցնել հակառակորդի քաղաքացիական համակարգի կորուստները հակամարտության դեպքում, կսահմանափակի հակառակորդի շարժը ռազմական թատերաբեմում»,- ասել է նախարարը եւ հավելել, որ ծրագիրը պետք է իրականացվի առավելագույնս արդյունավետ, նվազագույն ծախսերով:
Օհանյանը նկատել է, թե Հայաստանն իր ծրագրերն իրականացնում է՝ հաշվի առնելով տարածաշրջանային սպառնալիքներն ու անվտանգության խնդիրները, ուստի շատ է կարեւորում տեղական ռազմարդյունաբերական համալիրի զարգացումը, որը նվազագույնի կհասցնի կախվածությունն այլ երկրներից:
No comments:
Post a Comment